لمياء.أ.و.الدويهي .لبنان
خلقت عهالحال…
أوقات بحسَّك جوَّاتي بتتوهَّج
ومطرحَك ناطرك تا ترجع…
بحسّ بلهفة لعندك بتردني
كل ما الحياة من حالي أخدتني…
إنت الأساس
اللي بيخلِّي جوَّاتي الإشيا إلها أساس
الحب، السعادة، السلام…
مصدرها ذات الإنسان…
بس إنتَ بتوَعِّي فيني هالإحساس
والرّغبة إنّها تِنعاش…
الحب بدُّو اتنين حتّى ينقاس
وكل ما تصالحت الذات مع الذات
بيكمل وبيملِّي التاني من ذات الكاس…
إنتَ بحياتي للحب مركز إشعاع
وبتذكّرني بحلاوتو قد ما نكون بعاد
نحنا خلقنا تا نشهد لهالجمال
اللي بيعبِّي الروح والكيان
وبيخلِّيه يلاقينا مع الحال
اللي وعيت عالحب تا تحيا وينقال
« أنا بالحب خلقت عهالحال »…
لميا أ. و. الدويهي
١٣ /١٢ /٢٠٢٢