سكوب إلى السيد وزير الداخلية …. فين وصل فيلم البناء العشوائي في بوسكورة وشكون الأيادي البيضاء لي مسؤولة عليه. ؟

بقلم مول الحكمة.

الى السيد وزير الداخلية والمسؤولين ديال المصالح الإدارية بالوزارة. سوء التدبير والتسيير ولاو علامة بارزة في بوسكورة فهل من منقذ ؟

حكاية من واقع الخيال هادي لي تتعيش بوسكورة في اكسف فترة خصوصا ملي تيكون المسؤول ماعندوش غيرة وطنية على ولاد بلادو . ليوم فضيحة جديدة أبطالها السادة أعوان السلطة لي دارو مابغاو هما والسماسرية ديال الأراضي وطبعا معاهم الأستاذ الكاتب العمومي لي حافظ طريق توثيق المستندات مع السيد مول تصحيح الامضاءات لي الشعار ديالهم كاملين دهن السير يسير وحاجة الله قضاه الله ونساو أن الكاميرات ديالنا ترصد كل كبيرة وصغيرة في المنطقة بعدما عطات ريحتهم وكلشي ولا عارف وفاهم خطة العمل لي غاديا عليها الملحقة الإدارية رمل الهلال .ناس كثار تعدبو باش يأخذوا وثيقة من عند مقدم أو مسؤول في هاد الملحقة في حين انك إلا جبدتي القرفية شغلك تقضا ويقدر يجيبوه ليك حتيل الدار في إطار مشروع تقريب الإدارة من المواطن منظومة فاسدة ماعارفة مادير وكلشي على عينك ابن عندي يمكن هاد رمل الهلال فيها منجم ديال الذهب والمسؤولين في الإدارة الترابية مافراسهم ولو.
الهضرة كترات وجاء وقت الحساب قبل يفوت الفوت خاص تحقيق مع كل من واحد باغي يخرب هاد البلاد لأن القرار ولا تيتخاد في قهوة أحد السماسرة المعروفين في منطقة بوسكورة. ولخبار في راسكم حيث انتما عارفين كلشي وتاديروا عين ميكة.
انا قلت كلامي وانتما ديروا خدمتكم

هادا جهدي عليكم أولاد بوسكورة الأحرار

يتبع