مين قال؟…
لمياء.أ.و.الدوبهي.لبنان
مين قال؟…
مين قال إنُّو اللي بيناتنا كلام
شويّة أشعار وروايات؟…
مين قال إنُّو نِتْفِة وقت
وبيخلص كل شي
بتنوس الشعلة وبتنطفي
قللِّي مين قال؟…
اللي بيناتنا إحساس
أكبر من إنُّو ينقاس
بيغزل جواتنا
وبيعبِّي الكيان…
بيمشي بيناتنا
بلا ما يخاف…
بيحكي عن حالو وحالنا
بشويّة لفتات
لا بيسألني شو رأيي
ولا بيطلب منَّك سؤال
من قلبَك لقلبي بيتنقَّل
وبيحمِلَّك فيض من الأنا
بيتلاقى مع نفحات من الإنت
وبيتماشوا سوا
تا يوصلوا عمفارق
ما شافها حدا
غير إنتَ وأنا…
لميا أ. و. الدويهي
٥/١٠/۲٠۲۲
شارك هذا المحتوى:
إرسال التعليق