adminلميا أ. و. الدويهي.لبنان
إذا حاولنا نكون…
بحضورك هبِّت عاصفة
شلَّعت ابواب
وشلحتني بقلب العاطفة
وعلِّت الامواج
وبلبلت الأحوال
وشتَّتِت الأفكار
وغمرتني لأعلى المستويات،
بالأعماق…
وتحرَّك فيني الهوى
اللي بعدو ما انطفى…
قولَك بعدو هالحب جوَّاتي
أقوى من سنين الفراق القاسية؟…
أو هوِّي حنين
لَطَيف ماضي حزين
عم يحاول يرجع عن جديد
بركي بيخلص من الأنين
اللي ملازمو صارلو سنين
ويفرح باللي عم يصير؟…
أو يمكن هوي خضَّة
بتخلص بلحظة
وما بعود إلها معنى
لمَّا الواقع إلو بيرِدّْنا؟…
نظرات هالعيون
شو بتحكي وبتقول،
إشيا كلَّها جنون
وإشيا… ما بدِّي قول…
يمكن هيك أضمن للشعور
وأفضل ما تنجرح الروح،
اذا قابلنا حيط مسدود
بوج قرارنا مرفوع،
نتيجة قرار سابق مغلوط
منرجع ندفع حقُّو،
آهات ما بتخلص ودموع،
إذا حاولنا نكون…
لميا أ. و. الدويهي
۱۹/ ٦/ ۲۰۲۲
Please follow and like us:
بوشعيب مصليح
اوراغ محمد
admin
هند بومديان
