لميا أ. و. الدويهي.لبنان
قولَك…
قولَك إذا هالكلام بقلَّك
وفيه الإحساس بجرحلك،
مش يمكن من بعدها ترتاح،
وجواتَك تفهم الأحزان؟…
لو بتعرف قدَّيش عبالي بالعمق غوص
وإكشف فيه عن المستور
يمكن وشاح المرارة عن قلبك زيح
والوجع كلُّو بإيدَيِّ شيل…
قلبَك شقفة من هالقلب
وصار الوقت إنَّك ترتاح…
بس لو بتقول
إن كَنُّو الوجَع من قلبَك المَغدور
لكرامتك عم بيثور
أو لأنُّو بَعدو برَغم عذابو
معَلَّق بجلَّادو
ومش عم يقدر ينسى أحبابو؟…
عَلَّم فيك الزَّمن بطَعناتو
وأنت بالضَّحكة واجهت سهامو
بس دَمعات العَين كَشفو جروحاتو
وفَضحو الحب المخَبَّى جُوَّاتو…
هَيك الدهر بيزرع فينا حبَّاتو
تا بالوجع نُحصد غَلَّاتو…
كل ما هَبِّت رياح
أو اجتاحتنا عَتمات
ولمَشيئتو منْسَلِّم الذات
منِكسَب حِكمة وقوّة وفَهم وثبات…
لميا أ. و. الدويهي
٢٤ /٥ /٢٠٢٢
Share this content:
إرسال التعليق