مع قهوة الصباح….إلى السيد وزير التربية والتعليم كيفاش قصة مدرسة ابتدائية وحدة في بوسكورة؟

بقلم الشريف مول الحكمة.

عدنا والعود أحمد ولكن ليوم بقصة جديدة لي الضحايا ديالها ولاد الشعب من الطبقة الوسطى والفقيرة نعم أسيدي كيفاش هادشي ومنطقة بوسكورة لي فيها المشاريع السكنية فينما ما مشيتي ماقدروش المسؤولين ديالها يوفروا مدرسة ابتدائية لأولاد الشعب مع كل دخول مدارسي تنشوفوا الزحام لي على مدرسة القري ورغم الرسائل لي وجهنا للمسؤولين بخصوص هذا الشأن ولا من يحرك ساكنا كيفاش هاد التلاميذ غادي يقروا في قسم فيه 45 وفي عدد من المرات 55 واش هذا هو التحصيل الدراسي لولاد الشعب واش هادي بيداغوجية تربوية ممكن تعطينا أجيال نفتاخروا بيها طبعا لا . لأن المسؤولية هنا يتحملها مندوب وزارة التربية والتعليم وطبعا معاه المجلس الجماعي لي ماقدرش يخصص وعاء عقاري لبناء مؤسسة تعليمية مع العلم أن الأراضي موجودين خاص غير لي يتحمل المسؤولية ويبني مدرسة لأولاد الشعب .
باركة من لغة الخشب ونوضوا عرفوا المشاكل لي تتعيشها المنطقة لي ولات كارثية بكل المقاييس أعوان سلطة مرتشين بارون مخدرات فوق سلطة القانون قوادس مفركعين مستوصفات طبية في خبر كان تيحكم فيهم سكيرتي وزيد وزيد حتيل سيدي بوزيد هادي قصتي مشات مع الواد أولاد الجواد ساكنة بوسكورة تستاهل ما احسن و كل التقدير والاحترام لولاد الشعب.

رسالة إلى من يهمه الأمر واش غادي نشوفوا شي تحرك أم سيبقى الحال على ماهو عليه وسيناريو الوعود الكاذبة عاد من جديد؟
هادا جهدي عليكم وهادي فهامتي أولاد بوسكورة الأحرار.
فاصل ونواصل.
يتبع. …