اش هاذ المهزلة لي واقعة …اش خاصك العريان خاصني مهرجان مرس السلطان أمولاي

بقلم مول الحكمة الناصري.

اشنو قصة هاذ المهرجان لي نبع على غفلة تاني في مرس السلطان طبعا نديروا 6000 مهرجان لأن ساكنة المقاطعة تعيش في الترفيحة والرفاهية واش هاد المسؤولين عارفين اشنو واقع ولا باغيين فين يخسروا لفلوس في مهرجانات أقل مانقول عنها أنها ضعيفة من جميع النواحي. كيفاش دير منصة و وراءها وبجانبها روائح كريهة و أزبال في كل مكان إنه طبعا مهرجان مرس السلطان في الفترة الممتدة مابين 30 غشت و5 شتنبر.

حتى سالا الصيف وجا الدخول المدرسي عاد فاقوا هاد المسؤولين يديروا مهرجان لي طبعا غادي يخسروا فيه فلوس صحيحة وهما ماعندهم حتى لانسولين ديال السكر ولا أدوية الضغط الدموي في الجماعة ولي مشا عندهم تيقولوا ليه مقطوع مزال ماجاء اشنو هادشي السيد الرئيس الناس قبل مايديروا مهرجان خاصهم يوفروا للساكنة اشنو خاصهم ماشي نعطيوهم الوعود الكاذبة ونديوهم لمولاي يعقوب ونديروا لهم الحفلات في الزناقي

والحاجة الغريبة في الأمر أن منصة المهرجان كاينة بجانب احد المراكز الصحية لي من نهار سدوه عمرو تحل وراءها مباشرة أزبال و روائح كريهة بسبب عدم تواجد مراحيض عمومية في المنطقة مايضطر أغلبية زوار منطقة كراج علال ان يقضو حاجتهم بجانب حائط هذا المستوصف الذي يقع وسط ساحة كراج علال الشهيرة لي ولات اليوم مقرا رئيسيا لتجار المخدرات و المتشردين وغيرهم….

. زد على ذلك كله ورا هذا المستوصف كتعيش عائلة مكونة من 8 افراد اب و ام و 6 اطفال يفترشون الارض مند ازيد من 5 أشهر ولا من يحرك ساكنا . ها الكوارث كولها و مجلس مقاطعة مرس السلطان دار لينا مفاجأة ملي دار هاد المهرجان لي معرفناش شحال تخسر فيه ديال عمار حتى هو بشعار النشاط هاهو شاط.لي وراه المثل الشعبي المعروف “: زادو العكر على الخنونة”.

لذلك نطالب من السيد وزارة الداخلية بارسال لجنة تقصي الحقائق حول هذا الميزانيات لي ولات تتخرج هنا وهناك في الوقت لي اغلب ساكنة مقاطعة مرس السلطان تعيش تحت عتبة الفقر والبطالة وباركة ونوضوا تخدموا ولي ماقادرش يحط السوارت .

رسالة واضحة المعالم وبدون لغة خشب وباركة من نغطيوا الشمس بالغربال.

هادي فهامتي وهذا جهدي عليكم أولاد مرس السلطان الأحرار.

يتبع …