لمَّا بفكِّر فيك
لمياء.أ.و.الدويهي.لبنان
لمَّا بفكِّر فيك
لمَّا بفكِّر فيك
جوَّاتي بلاقيك،
وبلاقي حالي عم ناجيك،
وكأنُّو ولا لحظة وقَّفت حاكيك…
عَم شوفَك جوَّا،
مغلغل بالأنا…
وكأنُّو الإيَّام
بقيت مَطرَحها،
لا افترقنا ولا تألَّمنا
ولا عَلَّمِت فينا ووجَّعِتنا…
رجعنا نتهَدهَد عبساط الأحلام
نستقي الحب والفرح من نبعِ الآمال…
ورجعوا سلام النفس وراحة البال
يسكنوا هالدار من بعد فراق…
وكأنُّو قلبي وقلبَك الحنون،
ولا مرَّة وقفت دقَّاتون تقول:
بحبَّك أبعد من الجنون
وأعقل من أَحْكَم مَخلوق…
وباللحظة الجايي
خلص الكلام العادي
وتكَرِّس الوقت الحالي
والإيَّام اللي الباقية
تا حِبَّك ومنك ما إِشبَع
وتحبّني ومنِّي ما تشبع!…
لميا أ.و. الدويهي
٦/٩/۲٠۲۲
شارك هذا المحتوى:
إرسال التعليق