مع قهوة الصباح. … اش واقع في بوسكورة. …. كيفاش واش نبقاو تابعين الوعود الكاذبة تاع المسؤولين ؟

بقلم مول الحكمة .

أشمن حلمة حلمتها ليوم تاني على المسؤولين ديال بوسكورة لي خلاوا الشعب تآلف ودايخ بوعدوهم الكاذبة كيفاش قبل الانتخابات كانوا تيقولوا غادي نديروا ونديروا هادي وديك وديك. ودردليك الساعة هاد غير سيناريو السيد الرئيس مخلا ماقال على مشاكل المنطقة وأنه عنده عصا موسى لتحقيق التغيير في جميع المجلات الساعة هادشي كولو غير أوهام نمشيو عند النائبة ديالو لي من حزب الميزان لي حتى هيا تتشوف يوميا انتكاسات أزمة الصرف الصحي والقادوس الخانزين لي عايشين فيها ساكنة بوليكوما وحتى هيا مدارت ولو من غير الوعود الي كرهت الساكنة في المسؤولين والسلطات المحلية ديال هذا المنطقة الكارثية بامتياز . خصوصا ملي ولا واحد البارون ديال الحشيش والبوفا والقرقوبي حاكم الكروا. وحتى واحد ماقدر يديه للحبس يعني كلشي مع هذا اسكوبار لي رد منطقة بوسكورة قلعة محصنة لبيع الحشيش والكوكايين.

. عاد نشوفوا حريرة العدادات ديال الضوء والماء لي شادهم واحد النخبة ديال الجمعويين لي معندهم علاقة لا بليدك LYDEC ولا بالمكتب الوطني للكهرباء ONE لي بنا منزل عشوائي تياخد المكانة هاد المسلسل التركي الأبطال ديالو ناس خدامين في الجماعة معاهم عدد من أعوان السلطة بالملحقة الإدارية رمل الهلال لي عارفين كلشي ومافيهم لي يكتبوا تقارير على المنطقة المنكوبة ديالهم كلشي واكل من كيكا وحتى واحد مبغا يخدم ليوم ولينا عايشين تحت رحمة لوبيات الفساد الإداري لي تتبيع الوهم لعباد الله باركة من الوعود الكاذبة الساكنة ليوم رفعت شعارات ارحل ضدد الرئيس.

اجي تعرف علاش #طه_إرحل
⛔ إنارة عمومية كارثية
⛔ طرقات مهترئة
⛔ الغياب المطلق للفضاءات الترفيهية
⛔ الغياب المطلق للمساحات الخضراء
⛔ 4 ملاعب للقرب كارثية و رغم مجانيتها إلا ان المواطنين يتعرضون للسرقة
⛔ مشاكل في الماء الصالح للشرب
⛔ إنعدام قنوات الصرف الصحي في جل الأحياء و الإقامات و الفيلات
⛔ مشاكل الكلاب الضالة و إنتشار الازبال في كل شوارع بوسكورة
⛔ غياب فرص الشغل لابناء المنطقة رغم توفر بوسكورة على منطقتين صناعيتين
⛔ احتكار الصفقات العمومية (المقربون أولى)
⛔ مشاكل في الربط بالكهرباء (المقربون أولى)
⛔ 14 سنة من التسيير بدون اي تغيير
و اللائحة طويلة…..

هادشي كولو واقع في بوسكورة والسيد عامل عمالة النواصر ماسولش اشنو كاين وحتى تقرير أسود ماتوصلات بيه وزارة الداخلية زعماء في هذا الشأن ادن القضية فيها إن واخواتها. … والفاهم يفهم حقيقة هذا التمثيليات لي واقعة في بوسكورة منذ سنوات طويلة ولي الضحية ديالها الأول المواطن البوسكوري.
رسالة خاصة إلى السيد وزير الداخلية لإرسال لجنة افتحاص مالي لتحديد كافة الأمور المالية المتعلقة بمنطقة بوسكورة لي ولات تعد في مصاف المدن الأشباح .

كلشي مسؤول على هاد الوضع الكارثي وباركة نوضوا تخدموا راه دنوب المواطنين في عنقكم حتيل غدا يوم القيامة.
الهضرة كثيرة والسكات احسن ولكن مول الحكمة معاكم أولاد بوسكورة الأحرار حتى تقاد المنطقة لي عندها تاريخ وحضارة من زمان
هادي فهامتي وهذا جهدي عليكم.

هاد الصور حصرية ديال تدخل ديال كاميو باش يحيد الخنز من الواد الحار وها الشتاء بدات فكها يامن وحلتيها ملي تولي الفيضانات في الزناقي والشوارع.
يتبع. …