سكوب ….. متى سيتم طي ملف الروائح الكريهة الصادرة عن بلوعات الصرف الصحي بولاد بنعمر الدحامنة بمنطقة بوسكورة …ومن المسؤول ؟

بقلم مول الحكمة.

اشنو لي واقع في دوار ولاد بنعمر الدحامنة في بوسكورة تاني .

آسيدي السيناريو كيتعاود مع كل فترة انتخابات سوف وسوف؟ وسنقوم ؟ وكذا ؟ وكذا ؟ وحتى حاجة مادارت ولا غادي تقاد لي يبقى المواطن البوسكوري هو الضحية ديال الخنز لي خارج من الواد الحار وفاش بحتنا في هاد المشكل لقينا السيدة نائبة الرئيس هي لي مسؤولة على هاد الملف بعد الوعود لي تعطات على لسانها في إحدى التصريحات الصحفية أن هاد الدوار لم يستفد من مبادرة إنماء يعني لي فهم يفسر لينا
خصوصا ان المجلس الجماعي الموقر مقدرش يدير حتى حل وكيف ديما غير الوعود الكاذبة والمتكررة واش هاد الجماعة ديال بوسكورة فقيرة لحتيل هذا الدرجة باش دير حل لهادا المشكيل ديال الواد الحار طبعا لا عندها مداخيل كثيرة أهمها المقاولين لي عرفوا قيمة المنطقة وبناو مشاريع سكنية جديدة زيد عليها مزانية مجلس المدينة ومجلس الجهة و مداخيل الأحياء الصناعية وشركات الأدوية ومداخيل ديال الغابة وداكشي لي داير بيها من محلات ومرافق تجارية المهم لخبار كلها عندنا ولكن يمكن المسؤولين ديال المجلس الجماعي عندهم رأي آخر في هاد الملف ديال القوداس الخانزين لسنوات لي ولاو ديرين القلق لأولاد الشعب ولا من يحرك ساكنا . أعوان السلطة شافوا والقائد شاف ورئيس الجماعة شاف والنائبة ديالو شافت وحتى واحد ما تكلم ولا دار شي إجراء في هاد الملف الخطير الناس مرضات بالحساسية اعباد الله وأولادهم فيهم التهابات جلدية وانتما مزال كنتسناو السحاب كلامي واضح .
رسالة مباشرة وبدون لغة الخشب للتدخل العاجل في ملف هاد الواد الحار والقوداس الخازين لي دارو الفيضانات في الصيف وغادي يولوا ويدان في الشتاء ويقدوا يتسببوا في انهيار العمارات خصوصا أن القوادس تحت الأرض مفركعين.

المسؤولين ديال بوسكورة فيقوا معانا هادشي رآه متيعجبش ولي مقدرش على المسؤولية يحط السوارت .

هادي فهامتي وهذا جهدي عليكم أولاد بوسكورة الأحرار
يتبع. ..