لميا أ. و. الدويهي.لبنان
هاللحظات القليلة
شايف هاللحظات القليلة
اللي فيها بتحكيني
بتخلِّي الدني تضويلي
والعمر لعندَك يهديني…
كل شي فيك بيشبهني
كل شي فيك بيكمِّلني
كل شي فيك بفرِّحني
وبيصير يضحكلَك قلبي
ولعند قلبَك الضّحكة يودِّي…
قلبَك وقلبي اتنَين مجانين
من دون حكي متوافقين
وعدروب دروب مترافقين…
بعدو الحب وكأنُّو بأوَّلو
ونحنا والعمر بأوَّلو…
شو بتشبه لحظاتنا هيك البداية
اللي فيها الحياة بلا نهاية…
قلبَك وقلبي
تبادلوا المَطارح
قلبي سكنَك…
وقلبَك سكَنِّي…
وحتَّى تعيش،
صرت أنا فيك…
وحتَّى عيش،
صرت إنت فيِّي…
لميا أ. و. الدويهي
٢٥ /١١ /٢٠٢٢
