كل هالحب…

لميا أ. و.الدويهي.لبنان

كل هالحب…

كل هالحب جزء من كتير
تخطَّى الدني وفاق الحنين
ولمَّا لقاك من بعد سنين
رجع شوي شوي يدوب فيك…
كل هالحب قادر يكفيك
ويخلِّي إيَّامَك تشرق عن جديد…
ما بقلَّك قدَّيشك عايش فيه
وقدَّيشو هوِّي عايش فيك
وبَعدو بيناتنا «ما شي»…
قدَّامو سكت الكلام
وانتعشت الآمال
وانطرنا تتحقّق الأحلام
اللي كانت بيوم عالبال…
بين كلّ اتنَين
في عالم فريد
بيسندو القلبَين
وبيحكوا فيه لغة التكوين…
ومن لمَّا تهامسوا العَينَين
وتلاقوا النَّهدات
وحكيوا للقلب والرُّوح حديث
تمازجوا النبضات
وما عاد في قبل وبعد
ولا تاريخ علقان فيه الهوى…
اللي جايي بيناتنا أبعد من المدى
وصار بدُّو فيك يغل حتَّى يعيش
ومنَّك يستمدّ حالو
تا يحيي حالك،
وبين الحالَين
إنتَ بالأنا
وبالأنتَ الأنا…
لميا أ. و.الدويهي
١ /١٢ /٢٠٢٢