متل الأوَّل

لميا أ. و. الدويهي.لبنان

متل  الأوَّل
بعدَك متل الأوَّل
بتحكي وأنا بسمعلك
بعدَك لمَّا فيِّي بتطلَّع
قلبي من جوَّا بيضحَكلَك…
بَعدو الحب ناطر عالابواب
يمرق شي مرقة ويتلفَّتوا الأحباب…
صار العمر غفلة
والماضي أخد منُّو كَمشِة…
وشو اللي بعد باقي
من لمَّا كنَّا حالة،
فيها حالَك من حالي
وأحلامنا جوَّاتنا حالِّي؟…
قولَك بعد بيحرز المشوار
نتلفَّت صوبو شي نهار
ومن وجع الماضي نصير أحرار
وباللي جايي ما بقى نحتار؟…
إنت وأنا بتتجاذبنا أمواج
ومنِّي إلك ومنَّك إلي نَهدات…
مش يمكن الحب في إلو علينا دَين
نرجعلو متل الأوَّل اتنَين؟…
لميا أ. و. الدويهي
١٩ /٥ /٢٠٢٢