مع قهوة الأحد …. آشنو حريرة هاد العدادات الكهربائية ديال بوسكورة لي ديرين شي مسؤولين عراقيل باش ياخدها المواطن .

بقلم …مول الحكمة

واش هاد المسؤولين لي في بوسكورة ناعسين ولا في الكوما عيب وعار حنا في 2023 وباقي ولاد الشعب بلاضوء بلا ما وفين نعم السي في قلعة بوسكورة المنكوبة لي عانت من التهميش والإقصاء المباشر مند 14 سنة ولا زالت حتى يومنا هذا تعاني مشكل العدادات الكهربائية خلق بلبلة كبيرة في الشارع البوسكوري خصوصا أن لي مكلف به أشخاص هدفهم الأول و الأخير يضحكوا على الناس وطبعا إلا بغيتي ماتسناش جبد الزقلاف ولا بقا في غرفة الانتظار حتيل 82 في الشهر يعني التماطل المباشر وبطريقة قانونية بلا حشمة بلا حيا وطبعا كلشي على عينك ابن عدي هذا بوسكورة ولات وصمة عار على جبين مسؤولي جهة الدار البيضاء سطات بسبب العشوائية لي تتعيش فيها والإقصاء المباشر لشباب المنطقة لي باركين بلا خدمة بلا ردمة وخا عندهم دبلومات وشهادات عليا .
الأيام تدوز والمشاكل كثيرة وخاص التغيير لأن الساكنة عيات من سوء التدبير للملفات تاعها بداية من الملحقة الإدارية رمل الهلال مرورا بملفات البناء العشوائي والسطو على مساحة مهمة من المقبرة زيد عليها مشكل مستوصف القرب لي ولا عساس هو لي تيحكم فيه ونكملوا بالمشكل ديال الطريق والضوء والواد الحار لي حريرتهم حريرة . ونساليوا بمقر المجلس الجماعي لي كاين وماكين وطبعا الشاوش هو مول سلطة القرار واش تشوف الرئيس ولا لا واش السيد العامل ديال النواصر مافخباروا والو على هاد السيناريو لي واقع في بوسكورة أسئلة متكررة وأجوبة غائبة في منظومة غامضة .
المهم انا قلت كلامي وعلى المسؤولين يديروا خدمتهم .
هادي فهامتي وهذا جهدي عليكم أولاد بوسكورة الأحرار.

يتبع