هيك بيبقى..
لميا أ. و. الدويهي.لبنان.
هيك بيبقى…
والبيّ الصورة الصامتة القويّة
اللي محبِّتها ومشاعرها مخبيّة
حاضرة تا الأبناء تحمي
وبدموع العين إيَّامون تُضوي…
اليوم الوقفة إلك
تا نحيِّي حُبَّك
وعطر محبِّة نقدِّملَك
يا جسر البيت إنتَ
والقلب النابض
والعين اللي بتسهر
تا جفون الاولاد
بأمان تغفا…
ربّ البيت سمُّوك
ونسيوا إنَّك السُّور
اللي بالعاطفة مجبول
بيتلقَّى طعنات الظروف
وبيتحمَّل بصمت الجور
لأنُّو صورة عن الربّ العطوف…
بتبقى العيلة إم وبيّ متِّحدين
بوجِ العواصف ثابتين
حتَّى بعاطفتون يغذُّوا البنين
ويوجهوا حياتون عالدَّرب الصَّحيح…
لميا أ. و. الدويهي
٢۰/٦/۲۰٢٢
شارك هذا المحتوى:
إرسال التعليق