ولو رجعت إلي…
لمياء.أ.و.الدويهي.لبنان
ولو رجعت إلي،
كنت اخترتَك من زمان
شريك لقلبي
مليان حنان…
ولو رجعت إلي
كنت رافقتَك عدروب الحياة
وزرعت وجودَك جنَّات
فيها نتلاقى ونرشّ حوالَينا بَسمات
ننشر عطرها أفراح
ونتلِّي الدني ضحكات…
ولو رجعت إلي
ما كنت تركتَك تصارع وحدَك الامواج
ولا سَمحت لنسمة هوا تراشِق هالغمزات…
ولو رجعت إلي
كنت لَحَّفتَك برموش العَين
وضَمَّيتَك عقلبي بين النَّهدات
وودَّيت صوبَك بشاير حبّ وأشواق
ترافق دربَك
وتظلِّل طيفَك
وَين ما كان…
بس الحياة بأوقات وأوقات
بتطلَّب منَّا تضحيات
وبتودِّينا لمطارح بعاد
فيها الفراق
أقسى من المَمات…
بَس أوعى تخاف،
بحملَك بقلبي وفكري لَعِمق الذات
وبغذِّيك من هالذات،
لأبعَد من الأنفاس…
بس!… لو رِجعِت إلي…
لميا أ. و. الدويهي
٣ /٨ /٢۰٢٢
شارك هذا المحتوى:
إرسال التعليق