نشاذ

عبدو الدويهي.لبنان

نشاذ
في لغَّة بين اتنَين
مش بكتاب مقريِّة
هيِّي لحظة
بيحكي فيها القلب للقلب
بنغمة فيها الروح بتتنغَّم
بترقص على موسيقى مقسَّمِة
لاتنَين لغتون مش مكتوبة
ولا بالصَّوت منقولة
بيكفي العينَين تلتقي
تا يصير الصَّمت هوِّي القوي
لمَّا المنطق والفكر
بيخونوا الشعور
بلحظة يللي انكتب بضحكة
وأنفاس سريعة مقطَّعة
بتنسرق منُّو كلّ دقَّة ملحَّنِة
وبتعلى فوق الإيقاع
أصوات منشَّذِة
وبيتلاشى صوت القلب
وبتسكت الكلمة
وبيفترقوا الاتنَين
وكل واحد بطريقو بيمشي
وبتصير النَّغمة صدى لذكرى مهمَّشِة…

عبدو الدويهي
١۷ /١ /٢٠٢٣