بين الواقع والأحلام..

لميا أ. و. الدويهي.لبنان

بين الواقع والأحلام…

لمَّا الشوق إلك بيرجِّعني
والحنين إلك بيوجِّعني
بتصير اللحظات لعندك بتردني
وهيِّي من دونك عم تقهرني…
بعرف الظروف معاكسة
وعم تفرض إيقاعها القاسي
ومشوار الحياة عم ياخُد إنعطاف
لمطارح عم يجبرنا نكون بعاد…
وإيَّامنا ولو تلوَّنت برماد الفراق
بالقلب، المشاعر عم تنما حياة…
قلبي وقلبك تعوَّدوا البعاد
وما بقى تقدرلون الأوجاع…
عطيوا معنى جديد للمسافات
وحلَّقوا لمطارح بالإحساس
وسكنوا بالمدى المتعَمشق بحبال
العلقانة بين الواقع والأحلام…
لميا أ. و. الدويهي
٢٦ /١٢ /٢٠٢٢