قالوا عنَّك

لمياء.أ.الدويهي.لبنان

قالوا عنَّك…
قالوا عنَّك
خلصِت إيَّامَك
وولَّى زمَن أعيادَك
وإنَّك كنت المنارة
لشرق بطَّل يهواك…
قالوا عنَّك
كنت بيوم من الإيَّام
تسابق النجمات
وتُضوي عكلّ الناس
وشمسك ما بتنام
وقمرك من وهجها خجلان
قالوا عنَّك
بإزدرا واستخفاف
ضيعانو لبنان
فلُّوا أهلو
وركبوا ناسو
مراكب الترحال
وراحوا يفتشوا عنَّك بغير بلاد…
تاركين ضحكاتون ورا الباب
وذكرياتون عدراج الحياة…
وما عرفوا إنُّون
بعيد عن نسايم أرزك
رَح يتمرمورا
وعن ريحة ترابك
وشمِّة هواك،
رح يتململوا
وبقلب العالم ولو لَمَعوا،
رح يتشرَّدوا…
آه يا لبنان!
قدَّيشو قاسي قلب هالإنسان
بدُّو من هالدني كل شي
وما بيعرف يلامس فيك أغلى شي…
حملنا عأرضَك صليبَك
وتجرَّح من كتر القهر جبينَك…
حطَّينا رحالنا عندك
نسألَك تقوم من قبرَك،
القيامة بتلبقلَك…
قوم! قوم من وجعَك
من قهرَك وذلَّك!
الحياة خلقت إلَك
قوم وما بقى تقهر القلوب
بدَّها فيك تفرح لمَّا تعود
أرض الله المليانة نِعَم
بتصدّح فيها العاتابا والميجانا
وبتتلاقى شلالاتك بينابيع جبالَك
وجيشَك الأرزة عجبينو عليانة
بتصرخ للعالم أنا لبناني
بتردلَّها العزّ والكرامة
هنِّي الشاهدين عمجدَك
من لمَّا قرَّر إنُّو لبنان كان
حتَّى يكون فيه كل مين قال:
لبناني أنا وما بساوم
تا تخلص الدني والإنسان…
لميا أ. و. الدويهي
١٨/ ١١ / ٢٠٢٢