مع طاجين الغداء …. فين وصل مسلسل البناء العشوائي في منطقة بوسكورة واش السلطات المحلية ماكينيش؟

بقلم الشيخ مول الحكمة.

بوسكورة المعزولة …. بوسكورة المنكوبة وجهان لعملة واحدة إسمها التهميش.
قصة ليوم قصة سيناريو محبوك الأبطال ديالو هاد المرة عناصر السلطة المحلية لي غيبوا الضمير المهني ودارو عين ميكا على مجموعة ديال المخلفات المتعلقة بمجال التعمير القطاع لي فيه بزاف الاختلالات وطبعا تحت إشراف وتنسيق بين عصابة السماسرية وشي ناس في الملحقة الإدارية رمل الهلال والمجلس الجماعي ديال بوسكورة لي هلك المواطنين بالوعود الكاذبة لسنوات ولا شي تحقق لحد الآن ونزيدكم هاد المسؤولين راهم تيدوزوا يوما من حدا البناء العشوائي وعاجبهم الحال.
حنا بغينا نعرفوا هاد الشبكة لي خدامة تتحصد في الملايين بلا حسيب ولا رقيب ولي ولات بوسكورة كلها عارفاهم.
رسالة إلى من يهمه الأمر انا قلت كلامي وانتما ديروا خدمتكم. رآه الأمور أصبحت فوق الطاقة.
هادي فهامتي وهاد جهدي عليكم أولاد بوسكورة الأحرار.